گوندی بامۆك - ئه‌رشیف

2010-12-12
 بینراوه‌  : 55

گوندی بامۆك
بامۆك
یه‌كێك له‌ئاوایی و گونده‌ جوان و خۆشه‌كانی كوردستانی عێراق ناوی بامۆكه‌ , زۆر نزیكه‌ له‌ شاری هه‌ڵه‌بجه‌وه‌ ئێستا گه‌ڕه‌كێكه‌ له‌ گه‌ڕه‌كه‌كانی شاری هه‌ڵه‌بجه‌ .
ووشه‌ی بامۆك له‌ چیه‌وه‌ هاتووه‌ ؟ مانای چی یه‌ ؟ 
زۆر به‌دوایدا گه‌ڕاوم به‌ڵام وه‌ڵامێكی دڵنیاو ئارام به‌خشم ده‌ست نه‌كه‌وتووه‌ چه‌ند لێكدانه‌وه‌یه‌ك هه‌یه‌ له‌سه‌ری له‌وانه‌ : 
1. هه‌ندێك ئه‌ڵێن ووشه‌یه‌كی (سریانی یه‌) و به‌مانای سه‌رچاوه‌ی ئاو دێت یا شوێنی ئاودارو خۆش . 
2. هه‌ندێك ئه‌ڵێن (ده‌شتی فراوان و پڕ له‌ سه‌وزه‌گیاو گوڵ و گوڵزاره‌) له‌ بنه‌ڕه‌تدا توركی یه‌.
3. هه‌ندێكی تر ئه‌ڵێن له‌ناوی كه‌سایه‌تیه‌كی گه‌وره‌وه‌ هاتووه‌ و گۆڕان به‌سه‌ر ووشه‌كه‌دا هاتووه‌ ئه‌بێت بۆ بناغه‌و بنه‌ڕه‌تی ووشه‌كه‌ بگه‌ڕێنێت , باوه‌كۆچه‌ك كه‌سایه‌تیه‌ك بووه‌ , دیاره‌ بامۆكیش هه‌روه‌ها به‌ڵام پێ ئه‌چێت باوه‌گه‌وره‌ یا وشه‌یه‌كی تر بێت .
 
به‌ هه‌ر حاڵ تازه‌ ناوێكی ناسراوه‌و بڕاوه‌ به‌سه‌ری ئه‌م ئاواییه‌ جوانه‌ی كوردستاندا .
له‌ ساڵانی سه‌ره‌تای سه‌ده‌ی بیسته‌مدا هێنده‌ زۆرو گه‌وره‌ نه‌بووه‌و چه‌ند بنه‌ماڵه‌یه‌كی دیارو گه‌وره‌ی تیایدا ژیاوه‌ كه‌ زۆربه‌یان یا به‌ پشت خزم و كه‌سی یه‌كتر بوون یا له‌ ڕێگه‌ی ژن و ژنخوازیه‌وه‌ تێكه‌ڵ بوون و خزمایه‌تیان په‌یداكردووه‌
 
خه‌ڵكی بامۆك
خه‌ڵكی بامۆك به‌ زۆری سه‌رگه‌رمی كارو كه‌سابه‌تی ئاژه‌ڵداری و كشتوكاڵ بوون . 
زۆربه‌ی ماڵه‌كان چه‌ند سه‌ر مه‌ڕو بزنیان هه‌بووه‌ له‌گه‌ڵ چه‌ند مانگاو گایه‌كدا.
كشتوكاڵی بامۆك زۆربه‌ی ووشكه‌دان بووه‌ وه‌ك گه‌نم و جۆ و نیسك و نۆك و پاقله‌و ڕه‌شكه‌ و شمڵی , 
ته‌ڕه‌كاڵیش بریتی بوو له‌ : - 
توتن و ته‌ماته‌و خه‌یارو كوله‌كه‌و بامێ و لۆبیاو باینجان و كاڵه‌ك و شوتی و ترۆزی , له‌گه‌ڵ حه‌یوان به‌خێوكردن و كشتوكاڵدا هه‌ندێ كاروكاسپی تر ئه‌نجامدراوه‌ له‌وانه‌:
دار فرۆشی داریان هیناوه‌ له‌وشاخانه‌و باره‌داریان فرۆشتووه‌ به‌رد فرۆشی زه‌مانی زوو به‌ به‌ردكێش و كۆڵی كوێ درێژ بووه‌. 
له‌م دوایانه‌دا بوو به‌ گه‌ڵابه‌و تراكتۆر وه‌ تا ئێستاش جاره‌ جاره‌ كه‌ ئیشیان نه‌بێت به‌ردهه‌ڵ ئه‌كه‌نن باری ئه‌كه‌ن بۆ فرۆشتن.
ماست فرۆشتن: به‌روبوومی ئه‌و هه‌موو ڕانه‌ ئاژه‌ڵ و گاو گۆتاڵه‌ هێنده‌ زۆر بوو هه‌رچه‌نده‌ خێری زۆری لێ‌ ئه‌كرا هه‌ركه‌س له‌ بامۆك ناسراو و خزمی ببوایه‌ به‌ سه‌تڵه‌ دۆو ده‌به‌دۆوه‌ له‌بامۆكه‌وه‌ به‌ره‌و شار ئه‌گه‌ڕایه‌وه‌ هه‌ندێ له‌و ماست و دۆ و هێلكه‌و په‌نیرو شیرو كه‌ره‌یه‌ به‌سه‌رو به‌ كۆڵ ئه‌یان هێنا بۆناو شار ئه‌یانفرۆشت.
ورده‌واڵه‌ فرۆشی , ئه‌وه‌ی زۆر جێگه‌ی سه‌رنج و ڕامانه‌ پێاوێكی نابینا هه‌بوو ناوی (حمه‌ أمین قادر) مامی مامۆستا ملا تاهیر بامۆكی بوو , ئه‌م پیاوه‌ له‌ هه‌ڵه‌بجه‌ ورده‌واڵه‌ی ئه‌كڕی و له‌ماڵی خۆیدا دوكانه‌ بچكۆله‌یه‌كی هه‌بوو كه‌ چه‌ند باوه‌ڵێكی چینكۆ و صندوقێكی دارین بوو شته‌كانی له‌ناوا دانابوو ئه‌یفرۆشت.
هیچ مناڵێكی فیڵباز نه‌یئه‌توانی بیخڵه‌تێنێ‌ و پاره‌ی خراپ و بێ ڕه‌واجی به‌سه‌ردا ساغ بكاته‌وه‌ شمشاڵی لێ‌ ئه‌داو قسه‌ی خۆش بوو گه‌نج و لاوه‌كان له‌ده‌وری كۆ ئه‌بوونه‌وه‌.
هه‌رگیز خێرو سواڵی له‌كه‌س قبوڵ نه‌ئه‌كرد بگره‌ توڕه‌ش ئه‌بوو.
كاتی خۆی نزیكه‌ی 15 جوزئی قورئانی خوێندبوو زۆری له‌به‌ركردبوو له‌م دوایانه‌دا دامه‌زرابوو له‌ ئه‌وقاف به‌ بانگ بێژی مزگه‌وتی بامۆك تاكاتی شه‌هید بوونی له‌ 16/3/1988 دا به‌ كیمیابارانه‌كه‌ به‌رده‌وام بوو.
ژنی هێناو دوو كوڕی هه‌بوو , ژنه‌كه‌ی له‌ ساڵی 1974 دا مرد یه‌كێ له‌ كوڕه‌كانیشی به‌ ناوی معروف له‌گه‌ڵ خۆی به‌ كیمیا بارانه‌كه‌ شه‌هید بوو ته‌نها كوڕێكی ماوه‌ ناوی ڕۆوف حمه‌ أمین ه‌ له‌ هه‌ڵه‌بجه‌ی تازه‌ ئه‌ژی و خاوه‌نی ژن و دوو كوڕو كچه‌.
بامۆك له‌ سه‌ره‌تای دروست بوونی یه‌وه‌ مزگه‌وتی تیادا بووه‌و هه‌میشه‌ گرمه‌ی مه‌لاو فه‌قێ‌ و نوێژو بانگ و سڵاوی گوێ ی شه‌یتان و ناحه‌زانی ئیسلامی كه‌ڕكردووه‌ له‌زه‌مانی مه‌لیكه‌وه‌ قوتابخانه‌شی تیاكراوه‌ته‌وه‌و چه‌ند ڕۆڵه‌ی خوێندیان تیایدا ته‌واو كردووه‌ , ئه‌نداوزیارو دكتۆرو مامۆستاو كارمه‌ندی كارامه‌و پێش نوێژو وتار خوێن و نوسه‌رو شاعیرو وه‌رزشكارو بازرگانی گه‌وره‌و ناودارو به‌ڕێزی تیایدا هه‌ڵكه‌وتووه‌ .
بامۆك خه‌ڵكێكی بێوه‌یی و لاشه‌ڕی تیادا ئه‌ژی , ڕێزی خه‌ڵكیان گرتووه‌و میوانیان لاخۆشه‌ویست بووه‌ , گه‌ل و خاكی خۆیان خۆش ویستووه‌و خیانه‌تیان لێ‌ نه‌كردووه‌ و نه‌بوونه‌ته‌ دارده‌ستی بێگانه‌ , بامۆك له‌ساڵه‌كانی حه‌فتادا كاره‌بای هه‌بووه‌ ئێستاش كاره‌باو ته‌له‌فۆنه‌ و نه‌خۆشخانه‌و قوتابخانه‌ی سه‌ره‌تایی و ناوه‌ندی و مزگه‌وتی جوان و گه‌وره‌و هۆڵی بۆنه‌كانی پرسه‌ی پیاوان و ژنانی تیایه‌ كه‌ هه‌مووی له‌به‌ر ئه‌ركی ماڵی حاجی محمدی بامۆكی و كوڕه‌ به‌ڕێزه‌كانی ئه‌نجام دراوه‌ .
بامۆك جه‌راحی ناودارو شاره‌زای شكانی تیابووه‌ كه‌ به‌ڕێز حاجی حمه‌ لاو به‌گ بوو خوا لێ‌ ی خۆش بێت هه‌روه‌ها كاك جه‌میل حاجی حمه‌لاو كه‌ ئێستا شاره‌زای باشی هه‌یه‌ له‌و بواره‌دا , هه‌روه‌ها له‌ بامۆكدا چه‌ندین مامۆستاو كه‌سی زیره‌ك و به‌توانا و هه‌ڵكه‌وتوون كه‌ هه‌ندێكیان كۆچیان كردووه‌و هه‌ندێكیشیان له‌ژیاندا ماون له‌وانه‌ كۆچی دوای كردووه‌ مامۆستا (مه‌لا صاڵح قادر فتاح به‌گ) بامۆكی مامۆستا ملا عبدالطیف مولود بامۆكی له‌ژیاندایه‌  مامۆستا مه‌لا محمد ڕه‌شید بامۆكی له‌ژیاندایه‌ مامۆستا (حیدر ڕشید) بامۆكی كۆچی دوای كردووه‌ مامۆستای سه‌ره‌تایی بوو, به‌ڕێز هادی سعید  بامۆكی له‌ ژیاندایه‌ ئێستا له‌ كشتوكاڵی سلێمانی یه‌ , مامۆستا (سیف الدین أحمد) بامۆكی به‌ڕێوه‌به‌ری دراساتی ئیسلامی كه‌ شه‌هیدكرا , مامۆستا (ناصح ملا صاڵح) بامۆكی ئه‌ندام په‌رله‌مانی به‌غداد ئه‌ویش كۆچی دوای كردووه‌ , مامۆستا مه‌لا تاهیر أحمد بامۆكی پێش نوێژو ووتارخوێنی مزگه‌وتی عمری كوڕی ختاب , مامۆستا محمد ملا صاڵح بامۆكی پێش نوێژو ووتارخوێنی مزگه‌وتی شێخ اسماعیل , مامۆستا (معتصم سعید) بامۆكی پێش نوێژو ووتار خوێنی مزگه‌وتی بامۆك , مامۆستا (عبدالرحمن عبدالله) بامۆكی پێش نوێژو ووتارخوێنی مزگه‌وتی گوڵان .....
ده‌یان مامۆستای ناوه‌ندی و ئاماده‌یی و دكتۆرو مهندیس و قانونی و بازرگانی و سه‌ره‌تایی و سه‌دان قوتابی زانكۆو په‌یمانگاو ئاماده‌یی و سه‌ره‌تایی كه‌ ناكرێت ناوی هه‌مووی بهێنرێت.موختاری بامۆك به‌ڕێز حاجی محمد نظام محمود حاجی كاكه‌ عبدالله یه‌,وه‌ به‌ڕێز كاك حاجی عطا یه‌كێكه‌ له‌و پیاوه‌ به‌ڕێز و ماندونه‌ناسه‌ی كه‌ خزمه‌تی مزگه‌وت و لاوه‌كان و ئاواییه‌كه‌ ی خۆبه‌خشانه‌ كردووه‌

كۆد بۆ دروستكردنی وێبسایت و داتابەیس و دابین كردنی هۆست و دۆمەین
KOD for Developing Databases, Websites and Offering Domains and Hostings
https://www.facebook.com/kod4it
http://www.kod4it.com
سه‌ره‌كی  |  وانه‌ی خوشكان‌  |  وانه‌ی شه‌وان  |  هه‌مه‌ڕه‌نگ  |  ده‌رباره‌  |  په‌یوه‌ندی
Created by kod4it    -   All Right Reserved   © 2010 - 2018
ژماره‌ی سه‌ردان 33253     میوان 14